قدام عنيكى

عنيكى ندهت ع السنين الرافضة ترجع
رِجعت سنينى سنين ورا
وخدتينى وديتنى طريق
اتعلقت روحى كماالغرقان برمشك
ورمتنى بعيد
عند أول خطوه ليا
زغرتت كل الحكاوى
إخضر لونها
لما رجعت مُهرتى أول طريقى
وشافتنى واقف
مِحتار منين أبدأ خطاوى رِحلتى
ومنين أجيلِك

التفيت كل العطش دايب فِ بحرك
وانا وقلبى بقينا اصحاب
بنتكلم سوا عنّا
أتوه تُوهة خيال كدّاب
وابات سهران
وطول ليلى تُطل عنيكى تسحرنى
وتكتبنى كما العاشق كما الولهان
تغطينى
يدفينى دفا رمشك
أقوم بردان

نسِّمت دنيايا نسمة
رسمت خرايط
ولقيتنى فوق شطك هوا
ولقيتنى بابدأ م الألف
كل الكرم قُدام عيونك مختلف
وانا هاعترف
إن انا و القلب يومها اتفقنا
نقتل الخوف اللى ساكن فِ الضلوع
نِسبق الإصرار ونِقوى ع التَرَصُد
والأمل هوّ المُدافع
والخجل سابنى خلاص
صوتى وَصَل جوّه ضلوعِك
بتزلزلينى بصوت خُضُوعِك

تِنده عنيّكى أصعب عليّا
ارتمى وارجع أقوم أصعد واجيلك
ألتقينى لسه جنب الساقيه باسمع كل دقه
تُرج فيا
تِعيد عليّا كم سؤال كنت أتسئل ماعرفشى أجاوب :
إيه اللى خَلّى القلب يبقى صوته عالى
لما يشوفك؟
ليه لمّا افكر فيكى تِنزل دمعتى فوق الخدود
وافضل أحاول انى اجاوب
أفتح كتاب الشوق واجيلك
أنسى الكتابه
أكتب : "بحبك"
بس خايف م الديابه
أكتب :" هاجيلك "
بس بعد الناس ماترحل للسفر
وامد رجلى فوق رصيف شابك مدينتك
بس إكتبينى ف كراسات شوق العيال
الحلمانين حب بجُنون
وارسمينى فوق بُساط الريح قلوب
حاضنة الحمام
داير على كل وطن ارمى السلام
واما تجذبنى عيونك
ارتمى من فوق لتحت

مشغول انا وسط المهالك
مشغول وشاغلنى كلام
باين فِ عينِك
كل المَعاجم قفّلُوها
ما عرفوا كلمه من كلامِك
كل الشجر اقلام بتكتب
فِ انشغال البال عليكى
فِ انكســـــــار الروح وانا راجع
فِ طول مشوار رُجوعى
وانا الموعود
تيجينى ف كُل ليله
جوّه حلم اخضر صُغيّر
أفتحُه مالقاكى فيه
كُل الكلام أنا باحفظُه لما تقُوليه
وبادوب وانا باسمع شفايفِك بتنادينى
افرح قوى
افتح ببان العمر واسرح
تِرمح خُيول الذكرى تِسرى ف كل مطرح
وارحل أوام جوّه العيون
التقينى زى طقل بيبكى دايماً
اصعب على كل البشر
الا عليكى
والمرار ساكن ف حلق الكون
واكون جواكى لكن
مش حاسّه بيا
وتُشُوف عنيا شُوق بيرحل م الأماكن
تِنتقل احلامُه فيّا
قُدام عنيكى يِنقِتل كُل الخَرَس
يِطرح كلام
واصبَح غُنا بتدندنيه
واصبَح شروق
واما عنيكى تُطل فيّا اصحى وافوق
القى حقيقتى من جديد
قُدام عنيكى